കുട്ടികൾക്കായി ഉപയോഗിക്കുന്ന ബീൺ നർഷിൻ്റെ ഫീഡിംഗ് ബോട്ടിലുകളുടെ ഉപയോഗത്തിൽ മാതാപിതാക്കൾക്ക് മുന്നറിയിപ്പായി ഒമാൻ. കുട്ടികൾക്കായി ഉപയോഗിക്കുന്ന ബൂൺ ബ്രാൻഡിൻ്റെ 'Boon NURSH Silicone Bottle 8 oz. 3-Pack, Model No. B11564' എന്ന മോഡലിന്റെ ഉപയോഗത്തിനാണ് ഉപഭോക്തൃ സംരക്ഷണ അതോറിറ്റി (സിപിഎ) മുന്നറിയിപ്പ് പുറപ്പെടുവിച്ചിരിക്കുന്നത്.
ഈ മോഡൽ കൈവശമുള്ളവർ ഉടൻ ഉപയോഗം നിർത്തണമെന്നും അധികൃതർ നിർദേശിച്ചു. ബോട്ടിലിന്റെ ഭാഗങ്ങൾ വേർപെടാൻ സാധ്യതയുള്ളതിനാൽ കുട്ടികൾക്ക് ശ്വാസതടസം നേരിടാൻ സാധ്യതയുണ്ടാകുമെന്നാണ് അധികൃതർ പറയുന്നത്. ബോട്ടിൽ ഉപയോഗിക്കുന്നതിനിടയിൽ ഇതിന്റെ പുറത്തെ പ്ലാസ്റ്റിക് പാളിയുടെ ഭാഗങ്ങൾ അടർന്നു വീഴാൻ സാധ്യതയുണ്ടെന്നും അതിലൂടെ രൂപപ്പെടുന്ന ചെറിയ കഷണങ്ങൾ കുട്ടികൾ അബദ്ധത്തിൽ വിഴുങ്ങാൻ സാധ്യതയുണ്ടെന്നും സിപിഎ പറഞ്ഞു. ഈ ബ്രാൻഡ് മോഡൽ ഉൽപ്പന്നം വിൽക്കുകയോ വിതരണം ചെയ്യുന്നതോ ശ്രദ്ധയിൽ പെട്ടാൽ ഉടൻ സിപിഎയുടെ ഔദ്യോഗിക ചാനലുകൾ വഴി വിവരം അറിയിക്കണമെന്നും അധികൃതർ അറിയിച്ചു.
ഒമാൻ വിപണിയിലെ ഉൽപ്പന്നങ്ങളുടെ സുരക്ഷ ഉറപ്പുവരുത്തുന്നതിന്റെ ഭാഗമായാണ് ഈ മുന്നറിയിപ്പ്. പ്രത്യേകിച്ച് കുട്ടികൾക്കായുള്ള ഉപകരണങ്ങൾ സുരക്ഷാ മാനദണ്ഡങ്ങൾ പാലിക്കുന്നുണ്ടെന്ന് ഉറപ്പുവരുത്തുകയാണ് ഇത്തരം നടപടികളിലൂടെയെന്നും അധികൃതർ കൂട്ടിച്ചേർത്തു. കുട്ടികളുടെ സുരക്ഷ മുൻനിർത്തി ഇത്തരത്തിലുള്ള ബോട്ടിലുകളുടെ ഉപയോഗം പൂർണമായും നിർത്തണമെന്നും അധികൃതർ മാതാപിതാക്കളോട് നിർദേശിച്ചു.
Content Highlight: Oman’s Consumer Protection Authority has urged parents to stop using a specific Boon NURSH feeding bottle model after identifying a potential safety risk for children